Novas

15-02-2019 -

O Concello ofrecerá no Día de Rosalía unha degustación do “Caldo de Gloria” segundo a receita que a escritora legou no seu poema “Miña casiña, meu lar”

A concelleira de Cultura, Rocío Bértoa, avanzou esta mañá a completa programación de actos previstos polo Concello para conmemorar en Fene o Día de Rosalía, que se celebrará o 24 de febreiro. Pero, previamente á xornada central, dende este luns 18 e ata o domingo 24, a Biblioteca Municipal Xosé María Pérez Parallé albergará unha exposición de fondos bibliográficos con obras da autora galega ou sobre ela. Así mesmo, o Concello está a distribuír por todo Fene, e con especial atención aos establecementos hostaleiros, un díptico coa receita do “Caldo de Gloria”.
15-02-2019 -

O Concello propón vir a San Valentín este sábado para participar nunha sesión vermú co grupo “Los Bitch Boys”

Arranca a programación de “Vén a Fene” este sábado, 16 de febreiro. O concelleiro de Promoción Turística, Juan José Franco, convida a veciños e visitantes a disfrutar en San Valentín da sesión vermú organizada polo Concello de Fene, en colaboración coa asociación Centolos, no marco das festas patronais do barrio. Arrancará ás 14 horas no CPS e contará coa actuación estelar do grupo “Los Bitch Boys”. A entrada é libre e gratuíta.
14-02-2019 -

Máis de 260 judokas tomarán parte na xornada “Xogajudo” este sábado en Fene

O pavillón polideportivo de A Xunqueira acollerá este sábado 16 de febreiro a xornada “Xogajudo” da zona Lugo e Ferrol. A cita arrancará ás 11 horas e prolongarase ata as 13 e, nela, prevese a participación de 263 judokas. O campeonato está patrocinado pola Secretaría Xeral para o Deporte e a organización corre por conta da Federación Galega de Judo, coa colaboración do Concello de Fene.
13-02-2019 -

Charla sobre o alzheimer este venres en Limodre

AFAL Ferrolterra e a Asociación de Veciños de Limodre, en colaboración co Concello de Fene, organizan este venres unha charla informativa sobre o alzheimer. Será no local social da entidade veciñal, a partir das 18,30 horas e con entrada libre. A iniciativa forma parte do calendario de charlas que está a desenvolver AFAL no municipio de Fene para achegar á veciñanza esta doenza e os servizos que a asociación pon a disposición de persoas afectadas e familias.
12-02-2019 -

A unidade móbil de doazón de sangue desprázase a Fene este mércores e xoves

A unidade móbil de doazón de sangue desprazarase a Fene este mércores e xoves, 13 e 14 de febreiro. O mércores, permanecerá diante do centro de saúde en horario de tarde –de 15,30 a 21 h- e, o xoves, durante todo o día –de 9,30 a 14,30 h e de 15,30 a 21 h-. Dende o Concello, anímase á veciñanza a tomar parte na campaña de doazón.
12-02-2019 -

A Guía municipal “Vén a Fene” recolle preto de 170 propostas de lecer para disfrutar do municipio os 365 días do ano

O alcalde, Gumersindo Galego, e o concelleiro de Promoción Turística, Juan José Franco, presentaron en rolda de prensa a Guía de Ocio “Vén a Fene 2019”, na que se recollen preto de 170 propostas de carácter cultural, deportivo, gastronómico… de lecer en definitiva para visitar e disfrutar de Fene os 365 días do ano. Aínda así, a cifra medrará sen dúbida, xa que tal e como explicou Juan José Franco o departamento municipal de Turismo tan só incluíu as propostas ideadas polo Concello ata o mes de abril, incluído. Quérese deste xeito respetar a próxima cita electoral. A partir de maio, a guía recolle unicamente as iniciativas previstas polo movemento asociativo, múltiples e variadas. Saíron de imprenta 3.000 exemplares que o Concello repartirá entre as entidades do municipio, entidades supramunicipais e tamén a veciñanza en xeral, que poderá facerse cunha delas tanto no Concello como nas instalacións municipais. Ademais, colgarase na web municipal.
08-02-2019 -

O Concello de Fene abre a inscrición no Festival de Comparsas de Entroido 2019

Fene acollerá o mércores 6 de marzo o seu tradicional desfile e festival de comparsas de Entroido e, para fomentar a participación, este ano a concelleira de Cultura, Rocío Bértoa, avanza un incremento da partida reservada para axudas ás comparsas, dos 6.500 euros do 2018 aos 7.500 deste ano. O prazo para apuntarse está aberto e debe formalizarse no Rexistro Xeral do Concello con anterioridade ás 14 horas do martes 26 de febreiro.
07-02-2019 -

O Concello presenta este venres a Guía de Ocio “Vén a Fene 2019”

O concelleiro de Promoción Turística, Juan José Franco, informou esta mañá de que o Concello presentará mañá venres, 8 de febreiro, a Guía de Ocio “Vén a Fene 2019”. Unha publicación que recolle unha morea de propostas para disfrutar da cidade os 365 días do ano. Razóns que ofrecen tanto o Concello como o movemento asociativo de Fene.

Así, o acto celebrarase no salón de actos do CMIU Unidade de Fene –rúa Porto do Río, nº 21- a partir das 19,30 horas con entrada libre e de balde. Así mesmo, ao remate do mesmo, a Concellería de Promoción Turística repartirá as guías entre o público asistente.
07-02-2019 -

Fene acollerá o domingo o Campionato de Galicia Máster individual e por equipos de Campo a Través con preto de 400 atletas inscritos

Fene acollerá este domingo 10 de febreiro a XXXIII edición do Campionato de Galicia Máster de Campo a Través. Esta mañá, o alcalde, Gumersindo Galego; o concelleiro de Deportes, Xoán Manuel Bastida; o presidente da Federación Galega de Atletismo, Isidoro Hornillos, e o delegado en Ferrol da Federación, Paulino Cartelle, presentaban oficialmente a cita deportiva, na que tomarán parte preto de 400 atletas galegos, medallistas moitos deles en competicións europeas e incluso mundiais.
06-02-2019 -

O Concello retoma o Obradoiro gratuíto de Recuperación da Memoria para maiores de 55

O Concello, a través da Concellería de Servizos Sociais que dirixe Juana Barro, retoma este mércores o Obradoiro de Recuperación da Memoria coa vista posta na prevención de patoloxías asociadas á idade. Desenvolverase ata o mes de xuño todos os xoves, de 16,30 a 18 horas no Centro Municipal de Servizos Sociais. É gratuíto, quedan prazas libres e para anotarse as persoas interesadas deben dirixirse ao propio centro municipal –Avenida do Mar, bloque 1 baixo-. En todo caso, as persoas matriculadas no curso anterior non precisan realizar a inscrición.